A.S.Puşkin adyndaky döwlet rus drama teatrynda hindi dramaturgy Gopalakrişna Paraçuriniň pýesasy esasynda «Hindi söýgüsi» sahna oýnunyň görkezilişi boldy. Bu barada "Türkmenistan: Altyn asyr" elektron neşiri habar berýär.
Spektakl şadyýan, parlak konserte meňzeýär, onda ýedi tans kompozisiýasynyň bardygyny bellemek ýeterlikdir. Şol bir wagtyň özünde, sahnada tomaşaçylara baýlygyň güýç we hormatdygyny, garyplygyň bolsa hakyky söýgi berýändigini ýatladýan wakalar bolup geçýär. Her kim özüçe bir zady saýlaýar. Begenç Işangulyýew baş gahryman Santoşyň keşbini ussatlarça ýerine ýetirdi we ol sahnada Şiri saýlady hem-de Londondan gelen talypdygyna garamazdan, hakyky hindi daýhanyna öwrüldi diýip, neşirde bellenilýär.
«Hindi filmlerine tomaşa edip ulaldym diýip bilerin, şonuň üçin bu spektaklyň sahnalaşdyrylmagyny öňden bäri niýet edinip ýördüm. Ahyrsoňy, arzuwym hasyl boldy. Sahna oýnuna gaty köp adam – toparyň ähli aktýorlary diýen ýaly gatnaşýar. Hemmelere, ilkinji nobatda bolsa, ähli aktýorlary tansçylara öwürmegi başaran Adelina Nazarowa, Merdan Nurmuhammedowa we Begenç Işangulyýewe sag bolsun aýdýaryn" diýip, režissýor Baýram Garajaýew belleýär.