Üstümizdäki ýylyň güýzünde Ýaponiýada gipodontiýany - dişleriň dogabitdi ýoklugyny bejermek üçin döredilen täze dermanyň kliniki synaglary başlar. TASS-yň habar bermegine görä, Kitanonyň Lukmançylyk gözlegleri institutynyň (Osaka) we Kioto uniwersitetiniň eýeçiligindäki wençura kompaniýasynyň hünärmenleri tarapyndan bilelikde döredilen bu derman dişleriň şinelemegine täsir edip, olaryň et ýaryp çykmagyna we ösmegine itergi berýär.
Dermany döredijiler gipodontiýa keseli bolan adamlara dişiniň ýok ýerinde täze dişleri ösdürmäge mümkinçilik berer diýip umyt edýärler. Derman dişleriň ösmegine päsgel berýän beloklaryň hereketini basyp, şineleriň ösmegine we et ýaryp çykmagyna mümkinçilik berer diýip çak edilýär.
2018-nji ýylda alymlar şuňa meňzeş usuly ulanyp, syçanlarda we garynjalarda diş ösdürip ýetişdirmegi başardylar. Eger adamlarda geçirilen kliniki synaglar üstünlikli bolsa, derman stomatologiýada hakyky üstünlik bolup biler we gipodontiýadan ejir çekýän millionlarça adama täze umyt berer.
Synag gutarandan alty ýyl soň dermany amaly ulanmak mümkin bolar diýlip garaşylýar.
