Angliýanyň “Liwerpul” futbol klubunyň we Portugaliýanyň milli ýygyndysynyň hüjümçisi Diogu Žota ulag heläkçiliginiň netijesinde aradan çykdy. Futbolçy 28 ýaşyndady diýip, Marca neşiri habar berýär.
Onuň bilen bilelikde heläkçilikde onuň 26 ýaşly jigisi Andre hem ýogaldy. Ol hem professional futbolçy bolup, Portugaliýanyň “Penafiel” klubunda çykyş edýärdi.
Ýol-ulag hadysasy Ispaniýada, Samora welaýatynyň Sanabriýa sebitiniň golaýynda, A-52 awtomagistralynyň 65-nji kilometrinde bolup geçdi. "As" neşiriniň ýazmagyna görä, deslapky sebäp boýunça, ozuş wagty Diogu Žotanyň ulagynyň tekeri ýaryldy, şondan soň sürüji dolandyryşy ýitirdi. Awtomobil ýoldan çykyp, agdaryldy we ot aldy.
KHBS geçen hepde Žotanyň toýuny baýram edendigini ýazýar. Ol 2012-nji ýyldan bäri gatnaşykda bolan söýgülisi Rute Kardoza öýlendi. Olaryň üç çagasy bar.
Diogu Žota “Gondomar” we “Pasuş de Ferreýra” klublarynyň ýetişdiren oýunçysydyr. Dürli ýyllarda Madridiň “Atletikosynda”, Lissabonyň “Portu” we Angliýanyň “Wulwerhempton Uonderers” klublarynda çykyş etdi. 2020-nji ýylda “Liwerpula” goşuldy.
“Liwerpul” bilen bilelikde 2024/2025-nji ýyllarda Angliýanyň çempiony boldy we 2021/2022 möwsüminde Angliýanyň Kubogyny gazandy. Žota toparyň düzüminde 182 oýna gatnaşyp, 65 gol geçirdi we 26 assist etdi.
Portugaliýanyň milli ýygyndysy üçin 46 oýna gatnaşyp, 14 gol geçirdi. Ol iki gezek Milletler ligasynda ýeňiji boldy.
