7-nji maýda Aşgabat şäher häkimliginiň «Mekan» köşgünde 1941 — 1945-nji ýyllaryň Beýik Watançylyk urşunda gazanylan Ýeňşiň 79 ýyllygy mynasybetli uruş weteranlaryna, uruşda wepat bolan esgerleriň ýanýoldaşlaryna Türkmenistanyň Prezidentiniň adyndan gymmat bahaly sowgatlaryň gowşurylyş dabarasy boldy. Oňa ýurdumyzyň jemgyýetçilik guramalarynyň ýolbaşçylary, uruş weteranlary, il sylagly ýaşulular, talyp ýaşlar, şolar bilen bir hatarda köp sanly harby talyplar gatnaşdylar.
Beýik Watançylyk urşunda gazanylan Ýeňşiň 79 ýyllygy mynasybetli geçirilen çäräniň öňüsyrasynda oňa gatnaşyjylar bu ýerde ýaýbaňlandyrylan sergi bilen tanyşdylar. Onda ýowuz uruş ýyllaryny başyndan geçiren adamlaryň gaýratlylygyny, edermenligini beýan edýän gymmatlyklar, frontdan iberilen hatlar, fotosuratlar görkezildi.
Urşuň kynçylyklaryny egni bilen çeken ýaşuly nesliň wekilleriniň çykyşlary aýratyn täsirli boldy. Uruş weterany Antonina Prýaniçnikowa hem demir ýol gullugynyň goşun hatarynda Leningrad we Stalingrad şäherlerini duşman gabawyndan azat etmekde gaýratlylyk görkezip, Beýik Ýeňşe özüniň goşandyny goşupdyr. Onuň sözlerine görä, gazanylan Ýeňiş doganlyk halklaryň agzybirliginiň, Watan üçin gara başyny hem gaýgyrmaýan ogul-gyzlaryň merdanalygynyň aýdyň nyşanydyr.
Duşman gabawyna düşen parahat ilatyň başdan geçiren kynçylyklaryny gözleri bilen gören weteran Galina Mamedowanyň belleýşi ýaly, üstünden 79 ýylyň geçendigine garamazdan, Watan öz gaýratly ogullaryny hiç wagt ýatdan çykarmaýar. Häzirki bagtyýar döwrümizde olaryň hormat-sarpasy has belentden tutulýar. Biz parahatçylygyň, dost-doganlygyň, abadan durmuşyň Ýer ýüzünde dabaralanmagy ugrunda uly tagallalary edýän ýurtda ýaşaýarys.
Dabaraly çäräniň dowamynda uruş weteranlaryna hormatly Prezidentimiziň adyndan gymmat bahaly sowgatlar gowşuryldy.
