3-nji maýda Ýeňiş güni mynasybetli ýurdumyzyň ýokary okuw mekdepleriniň talyp ýigitleriniň arasynda geçirilýän «Berkarar döwletiň täze eýýamynyň bagtyýar gerçekleri» atly döredijilik bäsleşiginiň jemleýji tapgyry boldy. Bu barada Magtymguly adyndaky Türkmen döwlet uniwersitetiniň resmi saýtynda habar berilýär.
Jemleýji bäsleşik «Türkmengaz» döwlet konserniniň Medeni-işewürlik merkezinde geçirildi.
Türkmenistanyň Magtymguly adyndaky Ýaşlar guramasynyň Merkezi geňeşi we Bilim ministrligi tarapyndan bilelikde guralan bäsleşigiň birinji şerti boýunça talyp ýigitler özleriniň saýlap alan hünärleriniň jemgyýetdäki ornuny çeper okaýyş arkaly wasp etdiler. Soňra ikinji şerte laýyklykda, «Pähim-paýhas ummany Magtymguly Pyragy» ýyly bilen baglanyşykly türkmen ýigidine mahsus edermenlik, mertlik, ruhubelentlik, adalatlylyk häsiýetlerini açyp görkezýän aýdymdyr sazlar, goşgudyr sahnalar ýerine ýetirildi.
Üçünji şertde bäsdeş ýigitler ýekelikde şorta sözleri ýerine ýetirip, dabaranyň şowhunyny artdyrdylar.
Şeýlelikde, emin agzalarynyň beren utuklaryna laýyklykda, Magtymguly adyndaky Türkmen döwlet uniwersitetiniň türkmen dili we edebiýaty fakultetiniň 5-nji ýyl talyby Mekan Kurdow bäsleşigiň jemleýji tapgyrynyň baş baýragyna eýe boldy we ýeňiji diýlip yglan edildi.
Baýrakly orunlara eýe bolan we bäsleşige işjeň gatnaşan talyplar guraýjylar tarapyndan Hormat hatlary hem-de ýadygärlik sowgatlary bilen sylaglandylar.
