Ýaponiýanyň SLIM moduly aşa pes temperaturada we Gün şöhlesiz uzak wagtlap oňup biljekdigini görkezmek bilen, üçünji Aý gijesini şowly geçirdi. Bu barada Ýapon kosmos gullugynda (JAXA) habar berdiler diýip, IXBT ýazýar.
Ilkibaşda SLIM gonuş moduly Gün panellerini süýşürip, Aýyň üstüne nädogry tarapy bilen gondy. Şeýle-de bolsa, fewral aýynyň ahyrynda apparat garaşylýandan has ýokary bolup, Aý gijesinden - takmynan 14 Ýer gününden soň işläp başlady.
SLIM -130°C-a ýetýän buzly temperatura üstünlikli döz gelip, Aýyň üstüniň täze şekilleri Ýere iberdi.
24-nji aprelde JAXA üçünji gezek oýanandan soň, modul bilen üstünlikli aragatnaşyk saklandygyny tassyklady we aşa sowuk Aý gijelerine şeýle çydamly bolmagy göz öňünde tutulmadyk hem bolsa, gonuş modulynyň gurluşynyň berkligini tassyklady diýip belledi. Agentlik Aýyň ekstremal şertlerine SLIM-iň haýsy komponentleriniň has oňat çydamlydygyny kesgitlemek üçin, oňa gözegçilik etmegini dowam etdirer.
Ýapon Aý modulynyň 2024-nji ýylyň 20-nji ýanwarynda Ýeriň emeli hemrasyna gonandygyny ýatladýarys, netijede, Ýaponiýa Aýda ýumşak gonuşy amala aşyran bäşinji ýurt boldy.
