Aşgabat şäheriniň Bagtyýarlyk etrabynyň Çoganly ýaşaýyş toplumynda 720 orunlyk umumybilim berýän mekdebi we 320 orunlyk çagalar bagyny gurmak meýilleşdirilýär. Bu barada penşenbe güni Hökümet mejlisinde wise-premýer B.Annamämmedow habar berdi. Bu barada “Watan” habarlar gepleşiginde aýdyldy.
Bellenilişi ýaly, Çoganly ýaşaýyş toplumynda gurulmagy meýilleşdirilýän bu täze bilim edaralary “Türkmenistanyň Prezidentiniň ýurdumyzy 2022-2028-nji ýyllarda durmuş-ykdysady taýdan ösdürmegiň Maksatnamasynda” bellenen wezipeleri üstünlikli durmuşa geçirmek hem-de ýaş nesilleriň döwrebap bilim we terbiýe almaklary üçin has oňaýly şertleri döretmek maksady bilen gurlar.
Prezident Serdar Berdimuhamedow Aşgabat şäheriniň Bagtyýarlyk etrabynyň Çoganly ýaşaýyş toplumynda 720 orunlyk umumybilim berýän mekdebi we 320 orunlyk çagalar bagyny gurmak baradaky teklibi goldap, wise-premýere bu ugurda degişli işleri geçirmegi tabşyrdy.
