Türkmenistanda şahsy taraplar üçin niýetlenen “Internet-bank” we “Mobil-bank” ulgamlaryny ulanyşa girizmek meýilleşdirilýär. “Rysgal” paýdarlar täjirçilik banky tarapyndan işlenip taýýarlanan bu ulgamlaryň mümkinçilikleri barada wise-premýer H.Geldimyradow 19-njy aprelde geçirilen Hökümet mejlisinde Serdar Berdimuhamedowa hasabat berdi.
“Watan” habarlar gepleşiginde habar berlişi ýaly, wise-premýer mejlisiň barşynda karz edaralarynyň hasaplaşyklar-töleg ulgamlaryny yzygiderli kämilleşdirmek, sanly bank hyzmatlarynyň görnüşlerini artdyrmak boýunça geçirilen işler barada hasabat berdi.
Şunuň bilen baglylykda, ýurdumyzda menzilara ýerine ýetirilýän bank hyzmatlarynyň hilini ýokarlandyrmak we görnüşlerini giňeltmek arkaly nagt däl hasaplaşyklaryň möçberlerini artdyrmak boýunça alnyp barylýan işler barada aýdyldy.
Şunuň bilen baglylykda, “Internet-bank” we “Mobil-bank” ulgamlaryny ulanyşa girizmek barada teklip hödürlenildi.
Prezident Serdar Berdimuhamedow töleg ulgamlaryny yzygiderli kämilleşdirmegiň, sanly bank hyzmatlarynyň görnüşlerini yzygiderli artdyrmagyň zerurdygyny nygtap, hödürlenen teklibi goldady hem-de wise-premýere «Rysgal» paýdarlar täjirçilik bankynyň şahsy taraplar üçin niýetlenen döwrebap bank hyzmatlarynyň ulgamlaryny ulanyşa girizmek boýunça degişli işleri geçirmegi tabşyrdy.
