Dünýäniň iň garry erkek ýaşaýjysy Huan Wisente Peres Mora 114 ýaşynda aradan çykdy. Bu barada Wenesuelanyň Prezidenti Nikolas Maduro X sosial ulgamyndaky sahypasynda habar berdi. Muny News18-e salgylanyp, RBK ýetirýär.
Peres Mora 1909-njy ýylyň 27-nji maýynda El-Kobre şäherinde dünýä indi. Ol on çaganyň dokuzynjysydy. Mora bäş ýaşynda kakasyna we doganlaryna şeker çiňrigini we kofe ýygnamaga kömek edip başlaýar. Soň ol şerif bolup, ýer we maşgala dawalarynyň çözülişine jogapkär bolýar.
Ýaponiýada hem ýurduň iň garry erkek ýaşaýjysy Gisaburo Sonobe ýogaldy. Kyodo agentligi onuň Giba prefekturasynda 112 ýaşynda aradan çykandygyny habar berdi. Ölümiň senesi we sebäbi onuň ýakynlarynyň islegi boýunça aýdyňlaşdyrylmaýar.
Bellenilişi ýaly, Ýerde häzirki ýaşaýanlardan iň garry adam diýlip Ispaniýanyň 117 ýaşly ýaşaýjysy Mariýa Branýas Morera ykrar edildi. Ol garrylar öýünde ýaşaýar. Ginnesiň rekordlar kitabyna Morera 2023-nji ýylda 118 ýaşly fransiýaly Lýusil Randon aradan çykandan soň girdi.
Ähli döwürleriň iň garry adamy 122 ýyl 164 gün ýaşan Žanna Luiza Kalman hasaplanýar. Ol barly buržuaz maşgalasyndan bolandygy sebäpli, işlemäge mätäç däldi. Ýaşlygynda Kalman tennis bilen meşgullandy, welosipedde we tigirçekli konkide aýlandy, suwda ýüzdi we fortepiano çaldy. Ol 85 ýaşynda gylyçlaşma bilen meşgullanyp başlady. Žanna Kalman 1997-nji ýylda “tebigy sebäplerden” aradan çykdy.
