31-nji martda Bolgariýa we Rumyniýa Şengen sebitine goşuldy. Bu barada Ýewropa Komissiýasynyň (ÝK) beren beýanatyna salgylanýan Euronews habar berýär.
Goşulmagyň birinji tapgyrynda içerki howa we deňiz serhetlerinde serhet gözegçiligi ýatyrylar. Ýerüsti barlag-goýberiş nokatlary boýunça serhetden geçilende, häzirlikçe pasport gözegçiligi saklanar. Awstriýa Sofiýanyň we Buharestiň bikanun migrasiýa garşy göreşmäge ukyplylygy babatynda alada bildirýändigi üçin, bu meselede öz weto hukugyny ulandy.
Iki ýurt hem serhet gözegçiligini güýçlendirjekdigini we öz çäginden gaçybatalga berilmegi boýunça bildirilýän isleglere gaýtadan seretjekdigini aýtdy.
Şengen sebiti 1995-nji ýylda ýedi ýurduň arasyndaky serhetler açylanda işläp başlapdy: Belgiýa, Fransiýa, Germaniýa, Lýuksemburg, Gollandiýa, Portugaliýa we Ispaniýa. Şondan bäri ol sekiz gezek giňeldi. Oňa 2007-nji ýylda iň köp ýurt (dokuz) goşuldy: Çehiýa, Estoniýa, Wengriýa, Latwiýa, Litwa, Malta, Polşa, Slowakiýa we Sloweniýa.
