Soňky on ýylda Ýewropanyň zähmet bazary düýpli üýtgeşmelere sezewar boldy. Randstad agentliginiň berýän maglumatlaryna görä, 2014-nji we 2024-nji ýyllar aralygynda 2,3 million pes hünär taýýarlykly işgärler üçin iş orny ýitirim boldy, şol bir wagtyň özünde ýokary bilimli hünärmenler üçin boş iş orunlarynyň sany 20,8 million artdy. Bu maglumatlar “Zähmet bazarynda nesilleriň çekýän kynçylygy” atly täze hasabatda getirilýär.
Iş orunlarynyň ösüşiniň hemmesi diýen ýaly ýokary bilimli hünärmenler üçin boldy. Ispaniýada uçurymlar üçin boş iş orunlarynyň sany on ýylda 37,8% artdy (2,7 million ýer). Bu san maglumaty boýunça 88,2% bilen Türkiýe öňde barýar, ondan soňra Portugaliýa (58,2%) we Niderlandlar (48,8%) durýar.
Barlagyň awtorlary dokuz million onlaýn iş ornuny seljerip, uçurymlaryň ýarysyndan gowragynyň üç ugry - işewürlik we hukuk, saglygy goraýyş we inženerçilik ugurlaryny saýlandygyny anykladylar. Şol bir wagtyň özünde, IT we STEM ugurlaryna kembaha garalýar. Mysal üçin, Ispaniýada döwlet dolandyryşy, goranmak, IT we ylym boýunça hünärmenler ýetmezçilik edýär.
Zähmet bazary pensiýa ýaşyndaky işgärleriň sanynyň köpelmegi we COVID-19 pandemiýasyndan soň boş iş orunlarynyň düýpgöter köpelmegi sebäpli, çynlakaý kynçylyklar bilen ýüzbe-ýüz bolýar diýip, Randstad Research-iň müdiri Walentin Bote düşündirýär.
Rumyniýa, Gresiýa we Ispaniýa ýaly birnäçe ýurtlarda inženerçiligi gutaranlaryň sany azaldy. 2022-nji ýylda olar Germaniýada 22,5% bolsa, Ispaniýada 12%-denem az boldy we Şwesiýada 18,3% boldy. Ispaniýa IT ulgamynda hem yza galýar - talyplaryň 5,2%-i. Şwesiýada we Rumyniýada bu görkeziji 6%-den geçýär.
