Absolýut söweş çempionatynyň (UFC) başlygy Dana Uaýt sosial ulgamlarda Hamzat Çimaýew bilen awstraliýaly Robert Uittakeriň arasyndaky söweşiň 22-nji iýunda Saud Arabystanynda geçiriljek UFC Fight Night ýaryşynyň esasy wakasy boljakdygyny habar berdi. Muny gazeta.ru ýetirýär.
“Bu söweşden soň biz orta agramda UFC-niň çempiony titulyna kimiň birinji belgili dalaşgär boljakdygyny bileris” – diýip, Uaýt aýtdy.
Çimaýew 13-nji aprelde Las-Wegasda geçiriljek UFC 300 ýaryşynda-da söweşip bilerdi. Söweşijiniň özi islendik garşydaş bilen duşuşmaga taýýardygyny aýtdy, ýöne ýaryşyň musulmanlar üçin mukaddes Remezan aýynda geçirilmegi onuň çykyş etmezliginiň sebäbi boldy.
2023-nji ýylyň 21-nji oktýabrynda Çimaýew Abu-Dabide (BAE) geçirilen UFC 294 ýaryşynda nigeriýaly Kamaru Usmandan üstün çykdy. Söweş üç raund dowam etdi. Söweşijiniň hasabynda jemi 13 ýeňiş bar. Çimaýew UFC-niň ýarym orta agram reýtinginde dördünji orny eýeleýär.
