18-nji martda Brýusselde (Belgiýa) Ýewropanyň işewürler jemgyýeti bilen “Türkmenistan we ÝB: täze ykdysady hyzmatdaşlyga tarap” mowzugy bilen Tegelek stol guraldy. Bu ýerde Türkmenistanyň gyzyklanmalaryny ýurduň wise-premýeri, daşary işler ministri Raşid Meredow we Ministrler Kabinetiniň ýanyndaky Ulag we kommunikasiýalar agentliginiň baş müdiri Mämmethan Çakyýew görkezdi.
Gibrid görnüşinde geçen çärä gatnaşyjylar energetika, maýa goýum we söwda ýaly möhüm ugurlarda hyzmatdaşlygyň mümkinçiliklerini ara alyp maslahatlaşdylar. Çärä Ýewropanyň dürli ýurdundan 120-den gowrak wekil, şol sanda halkara guramalarynyň, diplomatik we maliýe edaralarynyň, ylmy-gözleg merkezleriniň, şeýle-de Sarens Group, Cargolux, Philips we Royal IHC ýaly Ýewropanyň öňdebaryjy kompaniýalarynyň ýolbaşçylary we wekilleri gatnaşdy.
Gatnaşyjylar öz çykyşlarynda Türkmenistan bilen ÝB-niň arasyndaky ykdysady hyzmatdaşlygy giňeltmek üçin uly mümkinçilikleriň bardygyny bellediler.
Soňra tegelek stoluň çäklerinde birnäçe aýratyn duşuşyklar geçirildi. Raşid Meredow Ykdysady Hyzmatdaşlyk we Ösüş Guramasynyň, eksport we maýa goýum boýunça Wallon agentliginiň ýolbaşçylary hem-de Philips we Picanol kompaniýalarynyň wise-prezidentleri bilen duşuşyklary geçirdi.
Mämmethan Çakyýew Antwerpen deňiz portunyň ýolbaşçylary we Cargolux, Exagon Global BV, Royal IHC, şeýle-de DEME kompaniýalary bilen hyzmatdaşlygyň meselelerini maslahatlaşdy.
Duşuşyklaryň dowamynda taraplar hyzmatdaşlygy giňeltmek, Türkmenistanyň dürli pudaklary üçin enjamlary ýola goýmak, potensial taslamalary öwrenmek, sanlylaşdyrmak, häzirkizaman tehnologiýalaryny ulanmak, telekeçiligi we maýa goýum işjeňligini ösdürmek meselelerini ara alyp maslahatlaşdylar.
Şeýle-de, Türkmenistanda Ýewropa kompaniýalarynyň hyzmat merkezlerini açmagyň perspektiwasy ara alnyp maslahatlaşyldy.
Taraplar netijeli hyzmatdaşlygy dowam etdirmäge gyzyklanma bildirip, işewürlik we maýa goýumlar üçin hukuk gurşawyny kämilleşdirmek boýunça teklipleri ara alyp maslahatlaşmaga taýýardyklaryny bellediler.
