18-nji martda Brýussele iş saparynyň dowamynda Türkmenistanyň daşary işler ministri Raşid Meredowyň ýolbaşçylygyndaky wekiliýeti Ýewropa Bileleşiginiň ýokary wezipeli diplomatlary bilen birnäçe duşuşyk geçirdi. Bu barada Türkmenistanyň DIM-iň metbugat gullugy habar berýär.
Ýewropa Geňeşiniň başlygynyň daşary syýasat boýunça baş geňeşçisi Saýmon Mordýu bilen geçirilen duşuşykda taraplaryň ýaşyl energetika, transport, tehnologiki baglanyşyk we beýleki ugurlar boýunça hyzmatdaşlygy ösdürmäge gyzyklanma bildirýändigi tassyklandy.
ÝB – Merkezi Aziýa çäklerinde hyzmatdaşlygyň we özara gatnaşyklaryň ikitaraplaýyn mehanizmleriniň ähmiýeti nygtaldy. Halkara we sebit meseleleri ara alnyp maslahatlaşyldy, Türkmenistanyň sebitde howpsuzlygy we durnuklylygy üpjün etmekdäki oňyn roly bellenildi.
Belgiýanyň daşary işler ministri Haja Lahbib bilen gepleşiklerde taraplar syýasy we medeni-ynsanperwer ugurlardaky hyzmatdaşlygyň häzirki derejesine we geljegine garadylar.
Söwda-ykdysady gatnaşyklary giňeltmäge gyzyklanma bildirildi.
Şeýle-de, Raşid Meredow Lýuksemburgyň wise-premýeri, daşary işler we daşary söwda ministri Ksawýe Bettel bilen duşuşdy. Onuň bilen türkmen diplomaty syýasy-diplomatik we söwda-ykdysady hyzmatdaşlygy çuňlaşdyrmagyň mümkinçiliklerini ara alyp maslahatlaşdy.
Sebit we halkara meselelerine seredildi, özara gatnaşygyň hukuk binýadyny berkitmegiň ähmiýeti nygtaldy.
