12-nji martda Ermenistanyň Döwlet filаrmoniýasynyň Arno Babajanýan adyndaky konsertler zalynda Türkmenistanyň medeniýet we sungat ussatlarynyň konserti geçirildi. Türkmenistanyň DIM-niň habar bermegine görä, konsert Magtymguly Pyragynyň doglan gününiň 300 ýyllygy mynasybetli guraldy.
Konserte Ermenistanda akkreditirlenen daşary ýurtlaryň ilçihanalarynyň we konsullyk edaralarynyň, halkara guramalarynyň wekilhanalarynyň ýolbaşçylary we işgärleri, ylmy jemgyýetçiligiň wekilleri gatnaşdylar.
Konserti Türkmenistanyň Ermenistan Respublikasyndaky ilçisi M.Aýazow we Ermenistanyň Bilim, ylym, medeniýet we sport ministriniň orunbasary Artur Martirosýan açdylar.
Konsertiň çäklerinde sahnada Türkmenistanyň medeniýet we sungat ussatlary çykyş etdiler. Şunda türkmen nusgawy edebiýatynyň görnükli wekili Magtymguly Pyragynyň, Gurbannazar Ezizowyň, Keýik Artykowanyň goşgularyna, meşhur ussatlar Nury Halmämmedowyň, Weli Muhatowyň, Hydyr Allanurowyň, Aman Agajikowyň, Komitasyň we Arno Babajanýanyň sazlaryna düzülen eserler, aýdymçylar B.Moşiýewiň we M.Orazberdiýewanyň, «Aşgabat Kamerata» kirişli saz gurallary toparynyň ýerine ýetirmeginde aýdyldy.
