Ýaşlardan (U18) düzülen Türkmenistanyň hokkeý boýunça ýygyndysy Keýptaundaky (GAR) ýaşlar dünýä çempionatyny GAR-yň toparyny 6:2 hasabynda utmak bilen tamamlady. 7-nji martda geçirilen duşuşyk ýaryşda türkmen ýaşlary üçin üçünji we iň soňky boldy.
Ýatlap geçsek, öň Maksat Ataýewiň ýolbaşçylygyndaky topar Tailanddan (7:2) üstün çykdy, ýöne Gonkongdan utuldy (3:8).
Gonkong, Tailand we Türkmenistan “B” toparçada 6 utukdan gazandylar, ýöne geçirilen we sypdyrylan şaýbalaryň tapawudyna görä degişli tertipde orunlary eýelediler. Indiki raunda Gonkongyň topary çykýar. Ýaryşyň eýesi bolan GAR-yň topary bir utuk hem gazanyp bilmedi.
Türkmen ýaşlary üçin bu şeýle derejeli ýaryşlarda ilkinji çykyş boldy. Ýaryş Halkara hokkeý federasiýasynyň (IIHF) howandarlygynda geçirildi.
