5-nji martda Türkmenistanyň daşary işler ministri Raşid Meredow bilen Ýewropada Howpsuzlyk we Hyzmatdaşlyk Guramasynyň Baş sekretary hanym Helga Şmidiň arasynda geçirilen duşuşygyň barşynda syýasy we ykdysady ulgamlarda, ekologiýa howpsuzlygynda we ynsanperwer gatnaşyklarda hyzmatdaşlygyň häzirki ýagdaýy we geljegi ara alnyp maslahatlaşyldy.
ÝHHG-niň ýokary derejedäki wekiliýetleriniň geçen ýylky saparlarynyň netijeliligi bellenilip geçildi. Şolaryň barşynda Aşgabatda ÝHHG-niň Merkeziniň täze binasy açyldy we Baş sekretaryň Merkezi Aziýa döwletleriniň daşary işler ministrleri bilen duşuşyklary geçirildi. Helga Şmidiň şu gezekki saparynyň çäklerinde Aşgabatda Merkezi Aziýa döwletleriniň daşky gurşawy goramak ministrleriniň duşuşygy üstünlikli geçirildi.
Hyzmatdaşlygyň möhüm meseleleri boýunça pikir alyşmalaryň barşynda sebit we dünýä möçberinde parahatçylygy, howpsuzlygy we durnukly ösüşi üpjün etmek maksady bilen, Türkmenistanyň işjeň gatnaşyklar ugrunda çykyş edýändigi bellenildi. Şunuň bilen baglylykda, döwletimiziň häzirki döwrüň wehimlerine we howplaryna garşy durmakda ÝHHG bilen ysnyşykly hyzmatdaşlyga berk ygrarlydygy nygtaldy.
