17-18-nji martda Türkmenistanyň Söwda-senagat edarasynda Türkmenistanyň Senagatçylar we telekeçiler birleşmesiniň döredilmeginiň 16 ýyllygy mynasybetli geçiriljek sergä myhman hökmünde Gazagystandan işewür toparyň gelmegine garaşylýar.
Gazagystanyň kompaniýalarynyň wekilleriniň Türkmenistana nobatdaky sapary bu senä gabatlanyp amala aşyrylar. Gazagystanly işewürler saparynyň barşynda şol bir wagtda türkmen telekeçileriniň we olaryň mümkinçilikleriniň köp ugurly taraplaryny ýerinde synlap, bu ýerde dürli ikitaraplaýyn işewürlik duşuşyklaryny geçirip bilerler.
Gazagystanyň işewür wekiliýetiniň iş meýilnamasy IT, elektronika we telekommunikasiýa, önümçilik we maşyn gurluşygy, oba hojalygy, gurluşyk, söwda we hyzmatlar ýaly ugurlarda mümkinçiligi uly türkmen hyzmatdaşlary bilen gepleşikleri geçirmegi öz içine alýar.
Şeýle hem gazagystanly işewürleriň Türkmenistanyň Senagatçylar we telekeçiler birleşmesiniň agzalary bilen duşuşyklary, öňdebaryjy kärhanalara, Döwlet haryt-çig mal biržasyna baryp görmekleri meýilleşdirilýär.
Işewürlik saparyny guraýjy bolup Astana diplomatik kluby çykyş edýär.
