Londonyň “Arsenalynyň” öňki halypasy Arsen Wenger Türkmenistandaky futbol janköýerlerine we söýüjilerine ýüzlendi. Meşhur fransiýaly hünärmen ýurduň beýik futbol ýurduna öwrülmegini arzuw etdi.
“Türkmenistandan ähli futbol janköýerlerine salam. Men siziň beýik futbol milletine öwrüljekdigiňize çyn ýürekden umyt bildirýärin. Ähli zadyň çagalary terbiýelemekden başlaýandygyny ýatdan çykarmaň – şonda islendik üstünlik mümkindir. Men size bil baglaýaryn” – diýip, FIFA-nyň global futbol bölüminiň ýolbaşçysy Dohada geçirilen FIFA-nyň okuw seminarynyň çäklerinde wideo ýüzlenmesinde aýtdy.
Çäräniň dowamynda Türkmenistandan tälimçi Röwşen Meredow Wengere türkmen halysyny sowgat berdi.
Hünärmenler seminarda dürli ýurtlarda, şol sanda Türkmenistanda futbolyň, aýratynam, çagalar futbolynyň ösüşini maslahatlaşdylar.
Meredow bu çärä FIFA-nyň tehniki hünärmeni hökmünde gatnaşdy. 2022/23 möwsüminde ol “Kaganat” futbol klubuna (Gyrgyzystan) ýolbaşçylyk etdi, ondan öň “Ahal” futbol klubuna (Türkmenistan) we HTTU (Türkmenistan) tälimçilik etdi. HTTU bilen 2014-nji ýylda AFK-nyň Prezidentiniň kubogyny gazandy. 2020-nji ýylda Meredow dünýäniň islendik ýurdunda milli ýygyndylar we klub toparlary bilen işlemäge hukuk berýän AFK PRO tälimçilik ygtyýarnamasyny aldy.
Arsen Wenger 22 ýyl (1996 – 2018) “Arsenalyň” baş tälimçisi boldy. Bu döwürde ol topary APL-iň üç çempionlyk titulyna, Angliýanyň Kubogynda ýedi ýeňşe getirip, klubuň taryhynda iň üstünlikli menejer boldy. Onuň ýolbaşçylygynda klub yzygider 20 ýyl Çempionlar ligasynda çykyş etdi we bir gezek finala çykdy.
