Türkmen dzýudoçylary Maýsa Pardaýewa we Serdar Rahymow 24-25-nji fewralda Warşawada geçirilen “Warsaw European Open 2024” ýaryşynda, degişlilikde, altyn we kümüş medal gazandylar. Bu barada “Türkmenistan: Altyn asyr” internet neşiri habar berýär.
Maýsa Pardaýewa arassa bäş ýeňiş gazanyp, 57 kg çenli agram derejesinde çempion boldy. Ol finalda ispaniýaly Marta Garsiýa Martinden üstün çykdy.
Serdar Rahymow 66 kg çenli agram derejesinde kümüş medala eýe boldy. Ol arassa dört ýeňiş gazandy, ýöne finalda ukrainaly Nikita Goloborodkodan ýeňildi.
Türkmen dzýudoçylarynyň ikisi-de Lebabyň göreş mekdebiniň uçurymlarydyr.
Maýsa Pardaýewa Köpetdag etrabynda Jora Matnazarowyň, Serdar Rahymow Hojambazda Baýram Şerapowyň tälimçiliginde dzýudo bilen meşgullanyp başlady. Häzirki wagtda olar ýaponiýaly hünärmen Kazuhiko Tokunonyň ýolbaşçylygynda Türkmenistanyň milli ýygyndysynda türgenleşik geçýärler.
