Özüniň ChatGPT çat-boty bilen belli bolan OpenAI amerikan kompaniýasy Sora ady bilen emeli aňyň esasynda täze gural döretdi. Bu barada kompaniýanyň resmi saýtynda habar berilýär.
Sora tekst beýany esasynda dowamlylygy 1 minuta çenli bolan hakyky we döredijilikli wideolary döredip bilýär. Neýroulgam rekwizitiň we personažlaryň takyk şekilleri bilen hakyky sahnalary hem döretmäge ukyply.
Şol bir wagtyň özünde, wideodaky personažlar ynandyryjy emosiýalary bildirip bilerler. Mundan başga-da, Sora hereketsiz şekilleri “janlandyryp”, taýýar wideolara kadr goşup ýa-da olaryň üstüni ýetirip bilýär.
Häzirlikçe Sora-nyň çäklendirmeleri bar, OpenAI neýroulgamyň çylşyrymly sahnalary modelirlemekde ýalňyşlyk goýberip biljekdigini duýdurýar.
Häzirki wagtda Sora bolup biljek zyýanlar we töwekgelçilikler babatda modeli bahalandyrýan “gyzyl toparlar” tarapyndan synagdan geçirilýär. OpenAI bu täze tehnologiýanyň oňyn ulanylyş taraplaryny kesgitlemäge kömek eder ýaly dünýäniň ähli ýerinden syýasatçylary, mugallymlary we hudožnikleri çekmegi meýilleşdirýär. Çünki, gürrüň wideo mazmun pudagyny üýtgedip biljek rewolýusion gural barada gidýär.
