Adani Group konglomeratynyň esaslandyryjysy, birwagt Aziýanyň iň baý adamy bolan Gautam Adaniniň baýlygy 100,7 mlrd dollara ýetdi we ol, Bloomberg-iň maglumatlaryna görä, dünýäniň iň baý adamlarynyň sanawynda 12-nji orny eýeledi. Şeýlelikde, Adani baýlygy 100 mlrd dollardan ýokary adamlaryň hataryna goşuldy. Bu barada kommersant.ru belleýär.
2023-nji ýylyň başynda bary-ýogy birnäçe günüň içinde hindistanly milliarderiň baýlygy Hindenburg Research amerikan analitik kompaniýasynyň derňewi neşir edilenden soň 37,7 mlrd dollara çenli azaldy.
2023-nji ýylyň 24-nji ýanwarynda neşir edilen bu derňewde kompaniýanyň analitikleri “Adani Group-yň onlarça ýylyň dowamynda paýnamalar bilen bagly hileler we hasabat galplyklary bilen meşgullanandygyna” subutnama görkezdiler. Bu wakadan soň, Adani Group-yň düzümine girýän kompaniýalar 150 mlrd dollara golaý bazar bahasyny ýitirdiler, jenap Adaniniň öz baýlygy bolsa 120 mlrd dollardan 80 mlrd dollardan gowrak azaldy.
Häzir Adani Group kompaniýasy belli bir derejede dikelmegi başardy. Konglomerat Qatar Investment Authority we TotalEnergies ýaly birnäçe uly maýadarlardan serişdeleri özüne çekdi. Girdejisi 130% ýokarlanan Adani Enterprises-iň maliýe hasabatyndan soň bolsa, konglomeratyň paýnamalary durnukly ösýär.
Ýanwar aýynda Hindistanyň Ýokary kazyýeti bazar düzgünleşdirijilerine üç aýyň dowamynda Adani Group bilen bagly ähli barlaglary we derňewleri tamamlamagy tabşyryp, bu mesele boýunça goşmaça derňewleriň zerur däldigini aýtdy. Diňe şu ýylyň başyndan bäri Gautam Adaniniň öz baýlygy 16,4 mlrd dollar artdy.
