Nýu-Ýork şäheri bu gezek hem dünýäde milliarderiň iň köp doglan ýeri hökmünde sanawyň başyny çekdi diýip, 2026-njy ýyl üçin dünýäniň iň baý 1680 adamynyň maglumatlaryna esaslanýan Visual Capitalist neşiri habar berýär.
PlayersTime seljermelerine we Forbes Real-Time maglumatlaryna görä, Nýu-Ýorkda 69 sany milliarder doglupdyr. Bu görkeziji ABŞ-nyň ondan soňky gelýän iň uly bäş şäheriniň bilelikdäki sanyndan hem köpdür. Şäherde doglan iň baý kişi — baýlygy takmynan 200 milliard dollar bolan Oracle kompaniýasynyň geňeşiniň başlygy Larri Ellison boldy.
Sanawdaky beýleki öňdebaryjy şäherler:
- Gonkong: 57 milliarder;
- Singapur: 30 milliarder;
- Mumbaý: 28 milliarder.
Bu şäherlerden bolan milliarderleriň esasy bölegi öz maýalaryny ABŞ-nyň, Hytaýyň we Hindistanyň bazarlarynda gazandylar. Beýleki şäherleriň arasynda Milan (16), Çikago (15), Rio-de-Žaneýro (15), Stambul (11) we Taýbeý (11) ýaly ýerler bar. Afrikanyň hiç bir şäherinde milliarderleriň sany 10-a ýetmedi.
Germaniýanyň Ingelhaým-am-Raýn şäherçesinde 10 sany milliarderiň doglandygy aýratyn bellenildi. Bu ýagdaý 1885-nji ýylda şol ýerde düýbi tutulan Boehringer Ingelheim derman senagaty kompaniýasynyň taryhy bilen baglanyşyklydyr. Germaniýanyň iň baý adamlarynyň hataryna girýän Býoringer maşgalasynyň wekilleriniň köpüsi hut şu şäherde doglandyr.
