Apple kompaniýasy Hindistandaky iPhone önümçiligini ep-esli artdyrdy. Häzirki wagtda kompaniýanyň smartfonlarynyň takmynan dörtden biri hut şol ýerde ýygnalýar.
Bloomberg agentliginiň maglumatyna görä, geçen ýyl Apple-yň potratçylary Hindistanda 55 milliona golaý iPhone öndürdiler. Geçen ýyl bu görkeziji 36 milliona deňdi. Umuman alanyňda, Apple her ýyl dünýä bazary üçin 220–230 million smartfon çykarýan bolsa, önümçiligiň dörtden bir bölegi Hindistandaky zawodlaryň paýyna düşýär.
Smartfonlary ýygnamak işleriniň bir bölegini Hytaýdan Hindistana geçirmek işi ABŞ-na getirilýän enjamlara goýulýan gümrük paçlarynyň ýokarlandyrylmak howpy döränden soň başlandy.
Önümçiligiň giňelmegine Hindistanyň häkimiýetleriniň goldawy uly ýardam etdi. Döwlet elektronika kärhanalary üçin infrastruktura ösüşlerini ýörite subsidiýalar arkaly goldady. Muňa garamazdan, baha tapawudy kem-kem azalýan bolsa-da, häzirlikçe Hindistanda iPhone öndürmek Hytaýa ýa-da Wýetnama garanyňda esli gymmada düşýär.
Häzirki wagtda Hindistanda iPhone 17 toplumynyň ähli modelleri ýygnalýar. Şeýle-de, Apple-yň bu ýerdäki potratçylary iPhone 15 we iPhone 16 modellerini öndürmegi hem dowam etdirýärler. Bu enjamlar ýurduň hem içki bazarynda satylýar, hem-de daşary ýurtlara eksport edilýär.
Mundan başga-da, Apple ýurtda smartfon şaýlarynyň, şol sanda akkumulýatorlaryň önümçiligini-de ösdürýär. Häzir Hindistanda kompaniýanyň alty sany resmi dükany hereket edýär. Şeýle hem şu ýylyň dowamynda bu ýurtda Apple Pay töleg hyzmaty hem işe giriziler.
