OpenAI emeli aň kompaniýasy ChatGPT we DALL-E 3 gurallaryny ulanyp döredilen ähli suratlaryň indi gelip çykyşyny kesgitlemek üçin suw bellik ediljekdigini mälim etdi diýip, Mashable habar berdi.
Kompaniýa şeýdip ýalan ýa-da ýalňyşdyrýan maglumatlaryň ýaýramagynyň öňüni almak, asyl eserleriň awtorlyk hukugyny goramak kararyna geldi.
ChatGPT we DALL-E 3 - bu tekstde beýan edilene esaslanýan hakykat şekillerini döretmäge mümkinçilik berýän tehnologiýalardyr.
Indi bu gurallar tarapyndan döredilen ähli suratlarda goýuljak suw belliklerinde guralyň çeşmesini we şekiliň döredilen senesini görkezýän metadata bolar. Suw bellikleri şekil döretmegiň hiline ýa-da tizligine täsir etmez, ýöne şekiliň ululygyny API arkaly 3-5% we ChatGPT ulananyňyzda 32% ulaldyp biler.
Metadata Adobe, Microsoft, BBC we ş.m. ýaly iri kompaniýalar we neşirýatçylar tarapyndan media mazmunynyň dipfeýklerine we manipulýasiýasyna garşy göreşmek üçin döredilen C2PA (Coalition for Content Provenance and Authenticity) standartyna laýyk geler.
ChatGPT, DALL-E 3, Midjourney, Bard we Copilot ýaly tehnologiýalaryň peýda bolmagy bilen dipfeýkleri döretmek, ýalan maglumatlary ýaýratmak we awtorlyk hukuklaryny bozýan suratlary çap etmek has aňsatlaşdy.
Ýakynda meşhur aýdymçy Teýlor Swift şeýle dipfeýkleriň pidasy boldy. Bu waka, aýratynam, meşhur adamlar babatynda şeýle manipulýasiýanyň öňüni almak üçin suraty barlamagyň we ýeterlik çäklendirmeleriň zerurdygyny görkezdi.
