Astronomlar bizden, takmynan, 137 ýagtylyk ýyly uzaklykda ýerleşýän ýaşap boljak täze bir planetany tapdylar. Ol gyzyl girdenek ýyldyzyň daşyndan aýlanýar diýip, Monthly Notices of the Royal Astronomical Society žurnalynda çap edilen täze gözlege salgylanýan Universe Today ýazýar.
TOI-715b diýlip atlandyrylýan bu planeta öz ýyldyzynyň konserwatiw ýaşaýyş diýilýän zolagynda ýerleşýär we bu bolsa ol ýerde suwuk suwuň bolmagynyň mümkindigini aňladýar. Ekzoplaneta Ýerden 1,55 esse uludyr.
Birmingem uniwersitetiniň Fizika we astronomiýa mekdebinden gözlegiň baş awtory Jorjina Dransfildiň belleýşi ýaly, TOI-715b öz ýyldyzynyň daşyndan bary-ýogy 19 günde aýlanyp çykýar, ýöne TOI-715 kimin gyzyl girdenekler biziň Günümize garanda has az ýagtylyk çykarýanlygy üçin, planeta aram howany saklamak üçin ýeterlik energiýa alýar.
Bu açyş diňe bir biziň galaktikamyzda ýaşap boljak dünýäleriň sanyny artdyrmaýar. Indi “Jeýms Webb” kosmos teleskopyny arkaly ekzoplanetalaryň atmosferasyny öwrenmek üçin ajaýyp mümkinçilik bar.
Geljekki gözlegler TOI-715b-iň durmuşy goldap biljegini-bilmejegini anyklar ýa-da älemde ýaşap boljak planetalar üçin zerur şertler baradaky düşünjämizi giňeldip biler diýip garaşylýar.
