ABŞ-nyň öňki Prezidenti Donald Tramp ýene bir gezek parahatçylyk boýunça Nobel baýragyna dalaşgärlige hödürlendi. Ony dalaşgärlige Nýu-Ýork ştatynyň respublikan wekili, Wekiller palatasynyň agzasy Klodiýa Tenni hödürledi.
Tenni ýurduň öňki Prezidentiniň «Awraam ylalaşygyna» – Ysraýyl bilen BAE-niň we Bahreýniň arasyndaky gatnaşyklary kadalaşdyrmak baradaky resminamalara gol çekilmegine goşandy üçin bu baýragy almalydygyny aýtdy. Onuň bellemegine görä, Trampyň bu ugurda hyzmatlary «örän uludyr we Nobel komiteti tarapyndan henize çenli degişli derejede ykrar edilmedi».
«Awraam ylalaşygyna» gol çekilmegine goşandy üçin Tramp parahatçylyk boýunça Nobel baýragyna üç gezek dalaşgär görkezildi. Şeýle-de bolsa, tarapdarlarynyň tutanýerliligine garamazdan, ABŞ-nyň öňki Prezidenti entek baýragy alyp bilmedi diýip, «Fox News» teleýaýlymy habar berýär.
Dalaşgärleriň doly sanawy gizlin saklanýar. Kanun boýunça, olar baýrak gowşurylandan 50 ýyl soň mälim edilip bilner. Emma her ýyl ol ýa-da beýleki dalaşgäriň hödürlenmegi baradaky maglumatlar guramalar ýa-da dalaşgär hödürlemek hukugy bolan adamlar tarapyndan habar berilýär.
