Germaniýanyň Volkswagen awtoöndürijisi emeli aň gurşawynda çözgütlere ünsi jemlejek täze kompaniýany esaslandyrdy. Bu barada interfax.ru habar berýär.
VW eýýäm halkara IT kompaniýalary bilen emeli aň önümleriniň üstünde bilelikde işlemek barada deslapky gepleşikleri geçirýär.
AI Lab adyny alan täze kompaniýanyň döredilmegi IT pudagy bilen hyzmatdaşlygy ýönekeýleşdirmäge we tehnologiýanyň artykmaçlyklaryndan peýdalanmaga mümkinçilik berer diýlip, kompaniýanyň habarynda bellenilýär.
“Biz müşderilerimize emeli aňyň kömegi bilen hakyky goşmaça bahany hödürlemek isleýäris. IT kompaniýalar bilen hyzmatdaşlyk biziň üçin örän möhüm. Biz geljekde guramaçylyk we medeni ugurlarda hyzmatdaşlygy ýönekeýleşdirmek isleýäris” – diýip, VW-niň baş ýerine ýetiriji müdiri Oliwer Blýum aýtdy.
VW sözleýşi tanamak tehnologiýalarynda we emeli aňyň kömegi bilen elektromobilleriň zarýad siklini optimizasiýalaşdyrmak ýaly beýleki hyzmatlarda uly potensial görýär.
