Özbegistanda bäş ýaşdan uly 254 milliondan gowrak agaç sanlylaşdyryldy. Bu barada Özbegistanyň Ekologiýa, daşky gurşawy goramak we howanyň üýtgemegi ministrliginiň metbugat gullugyna salgylanýan Gazeta.Uz habar berdi.
Agaçlary pasportlaşdyrmak Daşkentde synag režiminde geçiriler, şondan soň agaçlaryň diametri we ýagdaýy baradaky maglumatlar «Ýaşil Makon» elektron platformasynda sanawda görkeziler.
Iş üç basgançakda amala aşyrylýar. Ilki bilen gök agaçlyklar aerokosmik surata düşürilýär. Soňra agaçlaryň görnüşini, ýaşyny, beýikligini, ýagdaýyny we ýerleşiş koordinatlaryny görkezýän maglumatlar binýady dörediler. Üçünji tapgyrda her bir agaja identifikasiýa belgisi berilýär we «Ýaşil Makon» platformasynda pasport döredilýär. Hasaba alşyň netijeleri yashilmakon.eco web sahypasynda öz beýanyny tapdy.
Taslamany durmuşa geçirmezden ozal, özbek hünärmenleri ABŞ, Kanada, Hytaý, Hindistan, Awstraliýa, Russiýa, Germaniýa we Ýaponiýa ýaly ýurtlaryň tejribesini ünsli öwrendiler.
Daşkentde agaçlary pasportlaşdyrmak üçin 100 toplum enjamyň satyn alynýandygy bellendi. Toplumda agajyň ýerleşýän ýerini has takyk kesgitlemek üçin sputnik nawigasiýa ulgamyny (GNSS) kabul edijiler we esasy stansiýalar, aralygy lazer ölçeýji, planşetler we Field map programma üpjünçiligi bar.
