28-nji ýanwarda Türkmenistanyň Pakistandaky ilçisi А.Мöwlamow Pakistanyň Penjab welaýatynyň taryhy Taksila şäherinde ýerleşen “Zaildar House” binasynda her ýylda bellenilýän «Orange festivali» dabarasyna gatnaşdy. Çäre Yslamabatda akkreditirlenen diplomatik korpusynyň we harby attaşeleriniň duaýenleriniň edaralary hem-de Elaan Research Centre merkeziniň wise-başlygy Zaildar Ahsan Şahyň ýakyndan gatnaşmagynda guraldy. Bu barada Türkmenistanyň DIM-i habar berýär.
Çärä Pakistanyň Senatynyň başlygynyň orunbasary Mirza Mohammad Afridi, Pakistanyň wagtlaýyn Hökümetiniň agzalary, Yslamabatda akkretitirlelen daşary ýurtly ilçihanalarynyň ýolbaşçylary we wekilleri hem-de medeniýet we jemgyýetçilik işgärleri, işewürler gatnaşdylar.
Pakistanyň Senatynyň başlygynyň orunbasary gatnaşyjylara ýüzlenip medeniýet diplomatiýasynyň bu ýurduň baý taryhy mirasyny halkara arenasynda tanatmakda wajyp orun eýeleýändigini belläp geçdi.
Öz nobatynda diplomatik korpusynyň Duaýeni, Türkmenistanyň Pakistandaky ilçisi А.Мöwlamow, bu geçirilýän çäräniň daşary ýurtly diplomatlaryň Pakistanyň medeniýeti we taryhy bilen has ýakyn tanyşmaga hem-de dünýäniň ähli halklaryň arasynda özara düşünişmegiň berkidelmeginiň täsirli usuly bolýandygyny belläp geçdi.
Festiwala gelenler Pakistanyň baý medeniýeti we däpleri bilen ýakyndan tanyş bolmaga mümkinçilik döredenleri üçin onuň gurnaýjylaryna öz minnetdarlygyny bildirdiler. Daşary ýurtly myhmanlar ýerli köpçülikleýin habar beriş serişdelerine berýän interwýularynda Pakistan bilen medeni we syýahatçylyk gatnaşyklary giňeltmäge gyzyklanma bildirdiler.
