26-njy ýanwarda geçirilen Hökümet mejlisinde wise-premýer M.Mämmedowa şu ýylyň fewral aýynda geçiriljek esasy çäreleriň we medeni-durmuş maksatly binalaryň açylyp ulanmaga berilmeginiň tertibi barada hasabat berdi.
"Watan" habarlar gepleşiginde bellenilip geçilişi ýaly, fewral aýynda dürli döredijilik duşuşyklaryny, brifingleri, media-forumlary, okuw maslahatlaryny, sergileri, sanly ulgam arkaly ylmy-usuly maslahatlary, wagyz-nesihat çärelerini, aýdym-sazly dabaralary geçirmek meýilleşdirilýär. Mundan başga-da, çeper okaýyşlary guramak, dürli bäsleşikleri yglan etmek, ozal yglan edilen bäsleşikleriň jemini jemlemek, şeýle hem sportuň dürli görnüşleri boýunça ýaryşlary geçirmek göz öňünde tutulýar.
Şeýle hem Diplomatik işgärleriniň güni mynasybetli göz öňünde tutulan çäreler barada aýdyldy.
Şunuň bilen birlikde, Ahal welaýatynyň Gökdepe etrabynda kuwwatlylygy bir gije-gündizde 20 müň kub metre barabar bolan lagym arassalaýjy desganyň açylyş dabarasynyň meýilleşdirilýändigi habar berildi.
