26-njy ýanwarda geçirilen Hökümet mejlisiniň barşynda wise-premýer B.Atdaýew “Türkmenistanda öndürilen” milli haryt nyşanynyň şekilini taýýarlamak boýunça görülýän çäreler barada hasabat berdi.
“Watan” habarlar gepleşiginde habar berlişi ýaly, ýurdumyzyň önümlerini dünýä bazarlarynda giňden tanatmak boýunça göz öňünde tutulan çäreleri ýerine ýetirmek babatda degişli işler alnyp barylýar.
Söwda-senagat edarasynda degişli ministrlikleriň we pudaklaýyn dolandyryş edaralarynyň gatnaşmagynda pudagara iş topary döredildi. Häzirki wagtda bu topar tarapyndan “Türkmenistanda öndürilen” milli haryt nyşanynyň şekili hem-de milli haryt nyşany baradaky Düzgünnamanyň taslamasy işlenilip taýýarlanyldy.
Serdar Berdimuhamedow hasabaty diňläp, elektron söwdany guramakda hem-de harytlary sargyt etmekde, önümleri taýýarlamakda we ýerlemekde sanly ulgamy ornaşdyrmagy dowam etmegiň zerurdygyny nygtady.
Şeýle hem, «Türkmenistanda öndürilen» milli nyşany boýunça öndürilýän önümleriň möçberlerini we görnüşlerini has-da artdyrmak boýunça degişli işleri geçirmek möhümdir. Döwlet Baştutany ýurdumyzda öndürilýän ýokary hilli azyk we dokma önümlerini daşarky sarp edijilere giňden ýaýmakda mahabat işlerini yzygiderli guramagyň, Türkmenistanyň daşary ýurtlarda ýerleşýän Söwda öýleriniň işini has-da kämilleşdirmegiň möhümdigine ünsi çekip, wise-premýere bu babatda birnäçe tabşyryklary berdi.
