Özbegistanyň Jizak welaýatyndaky BYD Uzbekistan Factory zawodynda ýylda 50 müň birlik kuwwaty bilen gibrid we elektrik awtomobilleri ýygnamak boýunça taslama işe girizildi. Dabara Özbegistanyň prezidenti Şawkat Mirziýoýew we Hytaýyň BYD kompaniýasynyň prezidenti Wan Çuanfu onlaýn režimde gatnaşdy. Bu barada özbek lideriniň metbugat gullugyna salgylanyp, Trend habar berýär.
Özbegistanyň ýolbaşçysy HHR-e döwlet saparynyň çäklerinde Şençžendäki BYD-yň ştab-kwartirasyna we tehnologiýa merkezine baryp gördi. Metbugat gullugynyň maglumatlaryna görä, Şawkat Mirziýoýew ýakyn geljekde bazardaky islegi göz öňünde tutup, model hataryny giňeltmegiň we awtomobil önümçiliginiň kuwwatyny ýylda 300 müňe ýetirmegiň zerurdygyny nygtady.
Şeýle-de, kompaniýanyň Özbegistanda BYD elektrobuslaryny ýygnama işini ýola goýmak boýunça meýilnamalary goldanyldy.
Belläp geçsek, BYD bilen “Uzawtosanoat” paýdarlar jemgyýetiniň bilelikdäki kärhanasy 2022-nji ýylyň dekabr aýynda döredildi. Zawod Özbegistanyň günbataryndaky Jizak welaýatynda ýerleşýär. Kärhanada BYD Chazor sedanynyň we Song Plus krossoweriniň önümçiligi ýola goýuldy.
