Türkmenistanyň ilçisi Muhammetnyýaz Maşalow Kuala-Lumpur şäherinde Malaýziýanyň daşary syýasat edarasynyň Günorta we Merkezi Aziýa ýurtlary boýunça departamantiniň başlygy Şazelin Zaýnul bilen iki ýurduň arasynda ikitaraplaýyn hyzmatdaşlyk meselelerini maslahatlaşdy. Bu barada Türkmenistanyň Malaýziýadaky diplomatik wekilhanasy habar berýär.
Duşuşygyň dowamynda taraplar syýasy-diplomatik, söwda-ykdysady, medeni we ynsanperwer ulgamlardaky ikitaraplaýyn hyzmatdaşlygyň meselelerini maslahatlaşdylar. Hususanda, şu ýyl iki ýurduň arasynda ýokary derejedäki özara saparlary guramagyň mümkinçilikleri bellendi.
Türkmen ilçisi Magtymguly Pyragynyň doglan gününiň 300 ýyllygyny ýokary derejede belläp geçmegiň meýilnamasynyň çäklerinde guraljak çäreleriň ähmiýeti barada gürrüň berdi. Şeýle hem Türkmenistanyň we Malaýziýanyň ikitaraplaýyn we halkara guramalaryň çäklerinde netijeli hyzmatdaşlyk edýändigini bellendi.
