20-nji ýanwarda iş saparynyň barşynda Gurbanguly Berdimuhamedow Arkadag şäherinde desgalaryň gurluşyklarynyň bellenen möhletlerden yza galýandygyny belläp, Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň bu ugurda alyp barýan guramaçylyk işleriniň derejesine nägilelik bildirdi. Bu barada “Watan” habarlar gepleşiginde habar berildi.
Gurluşyk işlerinde Arkadag şäheriniň ekologiýa ýagdaýyna bolşy ýaly, desgalaryň öz wagtynda bina edilmegine möhüm ähmiýet berilmelidir. Şunda degişli talaplaryň berk berjaý edilmegi, binalaryň ýanaşyk ýerleriniň abadanlaşdyrylmagy möhüm wezipe hökmünde kesgitlenendir.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow D.Orazowa ýüzlenip, ýol berlen säwlikleri gysga wagtda düzetmek we Arkadag şäheriniň hemmetaraplaýyn sazlaşykly ösüşi bilen baglanyşykly meseleleri yzygiderli gözegçilikde saklamak babatda birnäçe anyk görkezmeleri berdi.
