19-njy ýanwarda geçirilen Hökümet mejlisinde wise-premýer B.Atdaýew söwda toplumynyň ministrlikleriniň we pudaklaýyn dolandyryş edaralarynyň 2024-nji ýyl üçin Iş meýilnamalarynyň taslamalary barada hasabat berdi.
Bellenilişi ýaly, ýurdumyzyň bazarlarynda halkyň sarp edýän harytlarynyň bolçulygyny we olaryň bahalarynyň durnukly derejesini mundan beýläk-de üpjün etmek boýunça çäreler göz öňünde tutulýar.
Dokma senagatynyň önümçilik kuwwatlyklaryny netijeli ulanmaga, öndürilýän önümleriniň görnüşlerini we möçberlerini artdyrmaga, halkymyzyň ruhy we medeni mirasy bolan halyçylyk sungatyny ösdürmäge aýratyn üns berler.
Taýýarlanylan Iş meýilnamasyna laýyklykda, Döwlet haryt-çig mal biržasynyň öňünde elektron söwdalaryny geçirmegiň döwrebap usullaryny ornaşdyrmak, ýurdumyzyň Söwda-senagat edarasynyň öňünde bolsa häzirki zaman tehnologiýalaryny ornaşdyrmak arkaly sergileri we maslahatlary guramak işini kämilleşdirmek wezipeleri goýuldy.
Şunuň bilen bir hatarda, hususy ulgamy mundan beýläk-de ösdürmek, onuň milli ykdysadyýetdäki ornuny ýokarlandyrmak, şeýle hem daşary ýurtlar bilen söwda-ykdysady gatnaşyklary giňeltmek, haryt dolanyşygynyň we eksportuň möçberlerini artdyrmak, Döwlet býujetini üstünlikli ýerine ýetirmek boýunça çäreler durmuşa geçiriler.
Serdar Berdimuhamedow wise-premýere söwda toplumyna degişli ministrlikleriň we pudaklaýyn dolandyryş edaralarynyň 2024-nji ýyl üçin Iş meýilnamasynda göz öňünde tutulan çäreleriň ýerine ýetirilişine berk gözegçilik etmegi tabşyrdy.
