11-nji ýanwarda Mary welaýata iş saparynyň çäklerinde türkmen halkynyň Milli Lideri Gurbanguly Berdimuhamedow kärendeçi-çopan Ataýew bilen bolan söhbetdeşlikden soň Garagum sährasyna syýahat etdi.
Ýylyň bu paslynda Garagum sährasynda ümsümlik bilen ýakymly howa utgaşyp, ynsan ruhuna ýakymly täsir edýän gudrat bar. Siňňin ýagşa ezilen sähranyň ösümlik dünýäsinde özüne çekijilik duýulýar.
Özboluşly ekoulgamly Garagum sährasyna aýawly çemeleşmek, onuň çäklerinde sähra haýwanlary üçin ekologiýa nukdaýnazaryndan amatly şertleri döretmek dowardarçylygy hem-de düýedarçylygy ösdürmek bilen baglanyşykly meseleler döwlet syýasatynyň möhüm ugurlarynyň hatarynda kesgitlenildi. Şunuň bilen baglylykda, Garagumuň çäklerinde ekologiýa syýahatçylygyny kemala getirmek üçin ägirt uly mümkinçilikleriň bardygyny bellemek gerek.
ÝUNESKO-nyň Bütindünýä miras komitetiniň 45-nji giňişleýin mejlisinde Bütindünýä mirasynyň sanawyna “Ýüpek ýoly: Zerewşan-Garagum geçelgesi” atly desgasyny goşmak kararyna gelindi. Munuň özi biziň ýurdumyzda medeni hyzmatdaşlygyň geriminiň giňelýändigini we Watanymyzyň halkara abraýynyň artýandygyny görkezýän ýene bir subutnamasyna öwrüldi diýip, Halkara habarlar merkezi habar berýär.
