Daşkentde Türkmenistanyň energetika ministri Annageldi Saparowyň hem-de "Türkmengaz" döwlet konserniniň başlygy Maksat Babaýewiň Özbegistanyň energetika ministri Jurabek Mirzaahmedow bilen duşuşygy geçirildi. Taraplar ýangyç-energetika pudagynda iki ýurduň arasyndaky hyzmatdaşlygy güýçlendirmegi ara alyp maslahatlaşdylar diýip, UzDaily habar berýär.
Gepleşiklere iki ýurduň energetika kompaniýalarynyň ýolbaşçylary we wekilleri hem gatnaşdy. Esasy üns Merkezi Aziýa döwletleriniň Baştutanlarynyň ýedinji konsultatiw duşuşygynda we Daşkentde geçirilen ýokary derejeli gepleşiklerde gazanylan ylalaşyklaryň iş ýüzünde durmuşa geçirilişine, şeýle hem Türkmenistanyň Prezidenti Serdar Berdimuhamedowyň turbageçiriji taslamalar bilen birlikde, has giň ugurlar boýunça hem hyzmatdaşlygy mazmunly ara alyp maslahatlaşmaga taýýardygy baradaky beýanatyna gönükdirildi.
Iki goňşy ýurduň wekilleri türkmen elektrik energiýasyny Özbegistana ibermek we üstaşyr geçirmek, ýangyç-energetika toplumynda bilelikdäki taslamalaryň geljegi we sebitde elektrik energiýasyny öndürmek we ibermek boýunça umumy ulgamy döretmek üçin ädimleri ara alyp maslahatlaşmagy dowam etdirmegi maslahatlaşdylar.
Gepleşikleriň netijesinde, gatnaşyjylar iki döwletiň ýolbaşçylary tarapyndan ylalaşylan başlangyçlary netijeli durmuşa geçirmäge üns berip, toplumda özara bähbitli we konstruktiw hyzmatdaşlygy ösdürmek boýunça bilelikdäki işleri dowam etdirmegi ylalaşdylar.
