11-nji ýanwarda Mary welaýatyna eden iş saparynyň çäklerinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň Prezidentiniň tabşyrygy boýunça harby howa menziliniň işi, bu ýerde bar bolan uçarlaryň we dikuçarlaryň tehniki aýratynlyklary hem-de harby uçarmanlaryň gulluk we durmuş şertleri bilen gyzyklandy.
Türkmenistan Halkara habarlar merkeziniň habar bermegine görä, Gurbanguly Berdimuhamedow bitaraplyk, dostluk we hoşniýetli goňşuçylyk syýasatyna ygrarly Watanymyzyň diňe goranyş häsiýetine eýe bolan harby doktrinasyndan gelip çykýan wezipeleri üstünlikli ýerine ýetirmegiň wajypdygyna üns çekdi. Ýurdumyzyň Ýaragly Güýçleriniň maddy enjamlaýyn binýadyny döwrebaplaşdyrmak, aýratynda, harby tehnikalaryň aýawly saklanmagyny, harby uçarlarynyň uçuş-gonuş zolagynyň bellenilen kada laýyk bolmagyny üpjün etmek häzirki döwrüň möhüm wezipesi bolup durýar.
Şahsy düzümiň hünär derejesini nazaryýet, jemgyýetçilik, syýasy we beden taýýarlygyny ýokarlandyrmak harby we hukuk goraýjy edaralaryň işini döwrüň talabyna laýyk derejede gurmak bilen baglanyşykly meseleler yzygiderli üns merkezinde saklanmalydyr diýip, Gurbanguly Berdimuhamedow belledi we bu babatda degişli ýolbaşçylara birnäçe maslahatlary berdi.
