Lebap welaýatynda ýerleşýän Seýdiniň nebiti gaýtadan işleýän zawody 2023-nji ýylda haryt önüminiň hereket edýän nyrhynda umumy önümçilik meýilnamasyny 117,7 göterim amal etdi.
Geçen ýylyň dowamynda hem kärhana boýunça çig mallaryň 489 müň 684 tonnasy gaýtadan işlenilip, 413 müň tonnadan gowrak önüm öndürildi. Munuň özi çig mallary gaýtadan işlemek we degişli önümleri öndürmek boýunça ýyllyk meýilnamalaryň degişlilikde agram hasabynda 110,7 we 100,2 göterim amal edilendigini aňladýar diýip, "Türkmenistan: Altyn asyr" elektron neşiri habar berýär.
Öndürilen harytlyk önümleriň 230 müň 390 tonnadan gowragy A-95, A-92 we A-80 kysymly benzin, 123 müň 680 tonna golaýy hem dizel ýangyjydyr. Şeýle hem zawodda dekabr-ýanwar aýlarynda jemi 30 müň 65 tonna golaý agyr wakum gazoýly, 5 müň 375 tonna mazut, 22 müň 680 tonna golaý hem ýol bitumy öndürilipdir.
Kärhanada önümçilige döwrebap enjamlaryň yzygiderli ornaşdyrylmagy bu ýerde öndürilýän önümlere bolan islegiň, şol sanda daşary ýurt sarp edijileriniň hem sanynyň artmagyna şert döredýär. Bu bolsa taýýar önümleri ýerleşdirmek boýunça hem netijeli işler alyp barmaga ýardam edýär. Kärhanada öndürilýän önümleriň Özbegistan, Owganystan, Gruziýa, Birleşen Arap Emirlikleri ýaly döwletlere eksport edilýändigini belläp geçmek bolar.
