8-nji ýanwarda Türkiýäniň Türkmenistandaky täze bellenen Adatdan daşary we Doly ygtyýarly ilçisi Ahmet Demirok Türkmenistanyň Daşary işler ministri Raşid Meredowa ynanç hatlarynyň nusgalaryny gowşurdy.
Şeýle hem ilçi Türkmenistandaky diplomatik işiniň dowamynda türkmen-türk gatnaşyklaryny mundan beýläk-de ösdürmek üçin ähli tagallalary etjekdigini nygtady diýip, Türkmenistanyň DIM-niň Metbugat gullugy habar berýär.
Duşuşykda taraplar syýasy-diplomatik, söwda-ykdysady, medeni-ynsanperwer ugurlarda ikitaraplaýyn hyzmatdaşlygyň köp sanly meselelerini ara alyp maslahatlaşdylar. Parlamentara hyzmatdaşlygyň, şeýle hem BMG, Yslam Hyzmatdaşlyk Guramasy we beýlekiler ýaly halkara guramalaryň çäklerinde özara gatnaşyklaryň mundan beýläk-de ösdürilmegine özara gyzyklanmalary beýan edildi.
Iň ýokary we ýokary derejelerde saparlary we gepleşikleri guramagy dowam etdirmegiň zerurlygyna aýratyn üns berildi.
