Ýewropa Geňeşiniň Başlygy Şarl Mişel Ýewropa Parlamentine saýlawlara gatnaşmagy meýilleşdirýändigini yglan etdi. Ol özüniň karary barada Belgiýanyň «De Standaard», «Le Soir» we «La Libre» gazetlerine habar berdi diýip, «Euronews» maglumat berýär.
«Men 2024-nji ýyldaky Ýewropa saýlawlaryna dalaşgär hökmünde gatnaşmak kararyna geldim. Eger meni saýlasalar, iýul aýynyň ortalarynda Ýewropa Parlamentiniň agzasy hökmünde kasam kabul edýänçäm, Ýewropa Geňeşiniň Başlygy hökmünde wezipe borçlarymy ýerine ýetirerin» diýip, «De Standaard» Mişeliň sözlerini belleýär.
Mişeliň Ýewropa Geňeşiniň başlygy hökmünde hukuklarynyň möhleti 2024-nji ýylyň noýabr aýynda tamamlanýar, Ýewropa Parlamentine saýlawlar bolsa iýul aýynda geçiriler. Ýewropa Geňeşiniň ýolbaşçysynyň we Ýewropa Parlamentiniň agzalarynyň wezipelerini utgaşdyryp bolmaýandygy sebäpli, Mişel saýlanan halatynda möhletinden öň wezipesinden gitmeli bolar.
«Politico» hem öz gezeginde Mişeliň kararynyň Ýewropanyň Liderlerine goşmaça agram salýandygyny belleýär, çünki olar onuň ornuny tutjak adam barada adatdakysyndan has gysga möhletde ylalaşmaly bolarlar. Ýogsam, Ýewropa Geňeşiniň başlyklygy wagtlaýyn Wengriýanyň premýer-ministri Wiktor Orbana geçer, çünki Wengriýa 2024-nji ýylyň iýul aýyndan dekabr aýyna çenli ÝB-niň Geňeşine başlyklyk eder.
