Türkmenistanyň Döwlet medeniýet merkeziniň Mukamlar köşgünde 2024-nji ýylyň şygarynyň we nyşanynyň many-mazmunyny wagyz etmek maksady bilen dabaraly maslahat geçirildi.
Maslahata Türkmenistanyň Mejlisiniň Başlygy we deputatlary, Hökümet agzalary, syýasy partiýalaryň, jemgyýetçilik guramalarynyň ýolbaşçylarydyr işjeň agzalary, ministrlikleriň, pudaklaýyn dolandyryş edaralarynyň, köpçülikleýin habar beriş serişdeleriniň, ýokary okuw mekdepleriniň wekilleri, ýurdumyzyň belli sungat ussatlary, döredijilik işgärleri, hormatly ýaşulular hem-de köp sanly ýaşlar gatnaşdylar.
Çäre bilen ugurdaşlykda, Mukamlar köşgüniň eýwanynda Türkmenistanyň Prezidentiniň «Ýaşlar — Watanyň daýanjy» atly kitabynyň, türkmen halkynyň Milli Lideriniň eserleriniň, şeýle-de halkymyzyň şekillendiriş, amaly-haşam sungatyna degişli gymmatlyklaryň sergisi-de guralyp, ol maslahata gatnaşyjylarda uly gyzyklanma döretdi. Bu ýerde sungat ussatlarynyň çykyşlary-da boldy.
Aýdym-sazlara beslenen dabaraly maslahatyň dowamynda edilen çykyşlarda täze ýylyň «Pähim-paýhas ummany Magtymguly Pyragy» diýlip atlandyrylmagynyň taryhy ähmiýetine aýratyn üns çekildi. Şanly ýylda döwlet hem-de halkara derejedäki dürli çäreleri guramakda, söz ussadynyň edebi mirasyny wagyz etmekde, şöhratyny dünýä ýaýmakda öňde durýan möhüm wezipeler barada pikir-garaýyşlar beýan edildi.
