Türkmenistanyň Döwlet medeni merkeziniň Milli muzeýinde Beýik Ýüpek ýolunyň Zerewşan-Garagum geçelgesiniň ýadygärliklerini ýaýratmak meselelerine bagyşlanan maslahat geçirildi.
Bu çäre Türkmenistanyň Milli taryhy-medeni ýadygärlikleri goramak, öwrenmek we dikeltmek boýunça edarasy tarapyndan gurnaldy. Oňa alymlar, Medeniýet ministrliginiň, döwlet taryhy-medeni goraghanalarynyň, Ylymlar akademiýasynyň Taryh we arheologiýa institutynyň ýolbaşçylary we wekilleri, şeýle-de degişli ýokary okuw mekdepleriniň mugallymlary we talyplary, muzeý işgärleri hem HBS-iň wekilleri gatnaşdy.
Ýatlap geçsek, Beýik Ýüpek ýolunyň Zerewşan-Garagum geçelgesi ÝUNESKO-nyň medeni miras obýektleriniň sanawyna goşuldy. Ol ýedisi Türkmenistanyň çäginde ýerleşýän 31 sany taryhy ýadygärligi jemleýär. Bu orta asyr şäherçeleri, galalar we kerwensaraýlardyr.
Maslahata gatnaşyjylara Ýüpek ýolunyň ugrundaky gadymy şäherçeleriň çäklerinde geçirilen arheologiýa gazuw-agtaryş işleriniň netijeleri görkezildi.
