Ýewropa komissiýasy X sosial ulgamynda gysga habar çap edip, onda USB-C-iň 2024-nji ýyldan başlap Ýewropa Bileleşiginde elektron enjamlar üçin umumy standart bolandygyny tassyklady.
"Garaşmaklyk ahyry tamamlandy. 2024-nji ýyldan başlap USB-C ÝB-de elektron enjamlar üçin umumy standart bolar. Bu has gowy zarýad beriş tehnologiýasyny, elektron galyndylaryň azaljakdygyny we gerekli zarýad berijileri tapmak meselesinde aladanyň azaljakdygyny aňladýar" - Ýewropa komissiýasy.
USB-C ÝB-de ählumumy interfeýs bolup hyzmat eder, sarp edijilere islendik markaly enjama zarýad bermekde islendik USB-C zarýad berijisini ulanmaga mümkinçilik berer. ÝB-iň talaplary ähli ykjam öýjükli telefonlara, planşetlere, sanly kameralara, garnituralara, ykjam ses güýçlendirijilere, ykjam wideo oýunlara, elektron kitaplara, gulaklyklara, klawiaturalara, syçanlara we çaklaň nawigasiýa ulgamlaryna degişlidir.
Mikro-USB tehniki sebäplere görä kem-kemden ulanyşdan aýrylýar, emma Apple-iň Lightning interfeýsi bitewi interfeýsiň öňünde iň uly päsgelçilik boldy. 2021-nji ýylyň sentýabr aýynda Ýewropa Komissiýasy 24 aýlyk geçiş döwri bilen, USB-C-ni ähli ykjam enjamlar üçin ählumumy standart hökmünde ulanmagy resmi taýdan teklip edipdi.
Şonda Apple bu ädime garşy çykypdy, ýöne ahyrynda iPhone 15 telefonlarynyň hemmesi USB-C-e geçdi.
