Dubaý şäherinde Dubai Reef taslamasy esasynda dünýädäki iň uly emeli rifleriň biri gurlar. Bu taslamanyň maksady daşky gurşawy goramakdan ybarat diýip, emirligiň Ykdysadyýet we syýahatçylyk departamentiniň metbugat gullugy habar berýär. Muny Interfax.ru ýetirýär.
Şeýlelikde, Dubai Reef taslamasy 600 inedördül kilometr meýdanda dürli ölçegli emeli rifleriň döredilmegini göz öňünde tutýar. Rif modullarynyň umumy göwrümi her ýyl ýedi million tonnadan gowrak uglerod tutmak ukyby bilen 400 müň kub metrden gowrak bolar. Taslamanyň durmuşa geçirilmegi merjen riflerini dikeltmäge, kenarýaka zolaklaryny goramaga we Dubaýyň kenarýakasynyň deňiz biodürlüligini dikeltmäge ýardam berer.
“Dubai Reef taslamasy 2024-nji ýylyň birinji çärýeginiň ahyrynda işe giriziler we dört ýylyň içinde tamamlanmagyna garaşylýar. Emeli rifler deňiz ýaşaýjylarynyň dürli görnüşleri üçin öý bolup hyzmat eder, rifiň kömegi bilen Dubaýyň kenarýakasynda deňiz gubkalarynyň, ustrisalaryň, mollýuskalaryň, leňňeçleriň, deňiz ýyldyzlarynyň, kirpileriniň we balyklaryň dürli görnüşleriniň täze populýasiýasy köpeler. Mundan başga-da, taslama Pars aýlagy sebitindäki howanyň üýtgemeginiň täsirlerine garşy göreşde möhüm rol oýnar” – diýlip habarda aýdylýar.
Departament taslamanyň balyk tutmak işini goldamak, balyklaryň populýasiýasyny köpeltmek we azyk howpsuzlygynyň derejesini ýokarlandyrmak boýunça maksatnamanyň bir bölegidigini belleýär. Ol sebitiň atmosferasyna kömürturşy gazynyň zyňyndylaryny azaltmakda hem möhüm rol oýnar.
