“Fransiýanyň gözeli – 2024” bäsleşiginiň ýeňijisi onuň 103 ýyllyk taryhynda ilkinji gezek gysga saçly gyz boldy. Bu hem bäsleşigiň dawa bilen tamamlanmagyna sebäp boldy. Bu barada lady.mail.ru habar berýär.
Şeýlelikde, Fransiýanyň demirgazygyndaky Nor-Pa-de-Kale sebitinden 20 ýaşly Ýewa Žil ýurduň iň gözel gyzy diýlip ykrar edildi. Ýewa öz ýeňşini bäsleşikde “üýtgeşiklik” üçin oňyn netije hökmünde belledi.
“Biz owadan Gözelleri uzyn saçly görmäge öwrenişdik, ýöne men kelte saçly androgin obrazy saýladym. Hiç kim siziň kimdigiňizi kesgitlemeli däldir. Her bir zenan özboluşly, biziň hemmämiz özboluşly” – diýip, “Independent” gazeti Ýewanyň sözlerini getirýär.
Müňlerçe fransiýaly Ýewanyň şeýle obrazy saýlap almagyna haýran galdy, sebäbi ol kelte saç üçin fransuz modasynyň baý däplerine eýerýär (Koko Şaneli ýatlamak bolar). Muňa garamazdan, auditoriýanyň galan bölegi eminler iň owadan gyzy däl-de, bäsleşigiň inklýuziwligini görkezmek üçin “üýtgeşik” gyzy saýladylar diýip hasaplaýar.
