2024-nji ýylyň 7-nji fewralynda Azerbaýjanda nobatdan daşary prezident saýlawlary geçiriler diýip, ýurduň häzirki prezidenti Ilham Aliýewiň kararynda görkezilýär.
"Azerbaýjan Respublikasynyň Merkezi Saýlaw Geňeşi 2024-nji ýylyň 7-nji fewralynda Azerbaýjan Respublikasynyň Prezidentiniň nobatdan daşary saýlawlarynyň bellenilmegini we olaryň Azerbaýjan Respublikasynyň Saýlaw Kodeksi tarapyndan bellenilen tertipde geçirilmegini üpjün eder" - diýip döwlet Baştutanynyň Permanynda aýdylýar.
Azerbaýjanyň Konstitusiýasyna laýyklykda, respublikanyň prezidenti erkin, şahsy we gizlin ses bermek bilen ählumumy, deň we göni saýlaw hukugy esasynda ýedi ýyllyk möhlete saýlanýar. Döwlet Baştutany sesleriň köplügi bilen saýlanýar.
Ilham Aliýewiň döwlet Baştutany hökmünde häzirki ýedi ýyllyk ygtyýarlyklarynyň möhleti 2025-nji ýylyň aprelinde dolýar, prezident saýlawlary hem şol wagt geçirilmelidi. Aliýew 2003-nji ýyldan bäri Azerbaýjana baştutanlyk edýär. 2018-nji ýylyň aprelinde ol dördünji gezek gaýtadan saýlanypdy.
