Türkiýäniň wise-prezidenti Jewdet Ýylmaz Aşgabatda geçirilen Türkmen-türk işewürlik forumynda iki ýurduň arasyndaky söwda dolanyşygynyň möçberiniň 2022-nji ýylda 2 milliard dollardan geçendigini, şu ýylyň 11 aýynda bolsa, 2,5 milliard dollara ýetendigini we ýylyň ahyryna çenli bu görkezijiniň 3 milliard dollara ýetirilmegine garaşylýandygyny aýtdy. Şol bir wagtyň özünde taraplar özara söwdanyň möçberini ýylda 5 milliard dollara ýetirmek meselesini goýupdylar.
Ýylmaz hyzmatdaşlygyň iň möhüm ugurlarynyň biri hökmünde energetikany görkezdi.
"Bu gün dürli derejedäki energiýa meselelerini içgin ara alyp maslahatlaşdyk" diýip, ol belledi. Anadolu habarlar agentliginiň mälim etmegine görä, Jewdet Ýylmaz: "Subut edilen tebigy gaz gorlary boýunça dünýäde dördünji orunda durýan Türkmenistan Aziýa bilen Ýewropanyň arasynda köpri hökmünde hyzmat edýän Türkiýe bilen tebigy gazyň dünýä bazarlaryna çykarmak meselesinde hyzmatdaşlyk edýär" diýip nygtady.
Jewdet Ýylmaz öz ýurdunyň elektrik üpjünçiliginde hyzmatdaşlyga taýýardygyny mälim etdi. "Türkmenistan bilen elektrik energiýasyny we tebigy gazy dünýä bazarlaryna eltmek üçin bilelikde täze we örän uly taslamalary bilelikde durmuşa geçirmäge we ösdürmäge taýýardyrys. Biz Türkiýä baranymyzdan soň ähli degişli edaralarymyzyň, hususan-da Energetika ministrligimiziň ýolbaşçylaryny bir ýere jemläris we bilelikde bu mesele boýunça anyk çäreleri göreris" diýip, ol aýtdy.
Ulag ulgamy, hususan-da Orta geçelge boýunça ýükleri daşamagy hyzmatdaşlygyň ýene-de bir ileri tutulýan ugry hökmünde görkezildi. “Türkmenistan we beýleki degişli ýurtlar bilen Orta geçelge boýunça ýük daşalyşyny ösdürmek boýunça işleri alyp barýarys. Ulag logistikasy meselesinde bilelikdäki tagallalary geljekde hem dowam etdireris " diýip, Türkiýäniň wise-prezidenti Jewdet Ýylmaz belledi.
