2024-nji ýylyň başynda Özbegistanyň UzAuto zawodynda Chevrolet Lacetti awtoulaglarynyň önümçiligi bes ediler. Zawodyň boşadylan kuwwaty beýleki modelleri öndürmek üçin gaýtadan paýlanar. Bu barada ýerli Awtostrada neşiri habar berdi.
Ulagyň ýygnalyşy gutarnykly ýapylmazdan ozal ýerli awtoulag sürüjilerine Limited Edition atly ýörite wersiýa hödürlener.
Deslapky maglumatlara görä, awtoulagyň kompaniýanyň konweýerlerindäki ýerini Onix, Cobalt-yň täze nesli we jikme-jiklikleri ýakyn wagtda aýan ediljek täze býujet modeli alar. Mundan başga-da, zawodda “Cadillac” markaly täze premium önüm öndürmäge taýýarlyk görülýär.
Özbegistanyň bazarynda Chevrolet Lacetti 106 at güýji bolan 1,5 litrlik hereketlendiriji, alty tizlikli awtomatiki geçiriji we öň oky hereketli tekerleri bilen elýeterlidir. Modeliň bahasy 184,8 million somdan başlaýar.
